Ons

Ek is gebore Chantell Marileen Schmahl op 1 Januarie 1987 in die Mowbrayhospitaal te Mowbray, Kaapstad. My ouers is Mabel Elizabeth Schmahl, née Tenner, en Leon Johannes Schmahl.

Ek is my ouers se enigste kind en het `n half-suster, Cavil, aan my pa se kant.

Ek't die eerste drie jaar van my lewe in Kaapstad deurgebring terwyl my ouers in die Parlement gewerk het. Ons gesin verhuis daarna na Pretoria waar ek die grootste deel van my lewe woon.

Ek was ʼn leerling aan Laerskool- en Hoërskool Garsfontein vanaf 1994 tot 2005. Op skool neem ek deel aan atletiek, speel netbal en sagtebal, en hou telling by krieketwedstryde. Ek neem ook deel aan redenaars, revue, my skool- en die Pretoria Jeugkoor, en die Eisteddfod kompetisies vir sang en blokfluit. Daarby doen ek noodhulp, neem deel aan uitreikprojekte, brugboukompetisies en Wetenskap Ekspo's. Ek verwerf erekleure in akademie, sport, kultuur en leierskap.

Na skool studeer ek LLB Regte aan die Universiteit van Pretoria en later aan die Universiteit van Suid-Afrika, maar besluit om my studies op te skort in my vierde jaar. Tydens my studies verhuis ek na Nieu-Seeland vir ʼn jaar en keer terug in 2009.

In 2010 sluit ek aan by MES Consultants South Africa en twee jaar later is AGRIFOODSA gebore.

Van kleins af is ek in my vrye tyd geïnteresseerd in museums, nuwe plekke sien en interessante ervarings. Vreemde kulture, geskiedenis en kuns is van my grootste belangstellings. My groot liefde is musiek en ek luister na ʼn wye verskeidenheid soorte. Ek sing self en speel kitaar. Diere is my ander groot liefde en ek is versot op my dierekinders.

My gesin en nabye familie is my alles.